Pag-park sa bricks sa Diversion Road, illegal suno sa LTO 6

Iloilo City–Illegal ang pag-park sa bricks sa Diversion Road, Mandurriao.

Ini ang gin-athag ni Mr. Jojo Jamerlan, chief sang Operations Division sang Land Transportation Office (LTO) 6, kasunod sang ila pagpangdakup sa mga naga-on road parking kahapon, Oktubre 3. Suno sa iya, makabig nga pedestrian walkway ang bricks kag dapat mga pedestrian lang ang mga naga-agi.

Kon naga-park suno sa iya ang salakyan sa pedestrian walkway, maagi sa dalan ang mga pedestrians kag daku ang posibilidad nga mabungguan.

Ginhingyo suno sa iya sang city government sa LTO nga i-clear ang Diversion Road apang kabahin man ang operasyon sang advocacy for public safety sang ahensya.

Ginpabutyag ni Jamerlan nga dapat ginarequire ang mga establisimento nga magbutang sang parking area. Apang gin-ako sini nga indi makasarang magbakal sang lote ang mga establisimento bangud nga mahal ang real estate sa Diversion Road. (AGB)