55-anyos nga lalaki natiruhan sang pulis sa Passi City, na-ospital
Passi City–Napilasan sa tuo nga paa ang 55 anyos nga matapos natiruhan sang pulis mga las 11:45 kagab-i, Oktubre 5, sa Barangay Cadilang.
Ginkilala ang biktima kay Paterno Pelencia, samtang suspect si SPO1 Aladin Palomo, 43 anyos, pareho nga residente sang nasambit nga barangay.
Suno kay Supt. Arturo Fullero, OIC Chief sang Paasi City Police Station, nagainom-inom ang grupo sang suspect kag sang biktima antes natabo ang insidente.
Base sa panaysayon sang suspect suno kay Supt. Fullero, ginbastos sang isa sa mga upod ni Pelencia ang babaye nga bisita ni SPO1 Palomo.
Wala naluyagan ni SPO1 Palomo ang pagpangbastos sang upod ni Pelencia bangud na-aktuhan niya mismo ang natabo.
Ginsaway sini ang grupo ni Pelencia apang ginpulihan pa siya sang grupo sang biktima rason nga napilitan ang pulis nga magpalupok sang pusil.
Gindala sa ospital ang biktima, samtang nagsurrender ang pulis kag detained na sa Passi City Police Station.
Si SPO1 Palomo ang assigned sa Passi City Police Station. (AGB)