ICPO Director Martin Defensor Jr., nagpasalig nga safe ang syudad sa pihak sang asod-asod nga insidente sang bomb threats kag pag-atake sang riding-in-tandem

Iloilo City — Nagpasalig ang Iloilo City Police Office nga wala sang dapat kabalak-an ang publiko sa safety kag seguridad sa syudad sa pihak sang asod-asod nga bomb threats kag pag-atake sang riding-in-tandem sang nagligad nga semana.

Suno kay ICPO Director Sr. Superintendent Martin Defensor Jr, yara sa Alert Level 1 gihapon ang syudad ukon wala sang presensya sang terorismo ukon dalagko nga pagpamahog kag risgo sa syudad.

Ini ang base sa bulanan nga evaluation sang national headquarters sang Philippine National Police.

Nanindugan man si Defensor nga madasig nga nakilala sang pulis ang nagpamahog sang pagbomba sa University of San Agustin kag Central Philippine University.

May ginasundan naman ang pulis nga posible motibo sa pagbilin sang indi matuod nga improvised explosive device ukon IED sa Ateneo de Iloilo apang nagpamalibad si Defensor nga hingadlan ini. (JoMaque)