Iloilo City — Lunsay may kaangtanan sa illegal drug trade ang mga gintiro-patay sang wala pa nakilal-an nga riding-in-tandem ukon motorcycle riding suspects sa syudad suno kay Iloilo City Police Office Director Sr. Superintendent Martin Defensor Jr.

Suno kay Defensor, posible may grupo nga gusto mag-monopoliya sa transaksyon sa illegal nga druga rason ginhimo ang krimen.

Dugang niya, posible man nga ang kaupdanan mismo sang mga biktima ang nagtiro-patay sa ila.

‘KLARO NGA MENSAHE’

Ginpahayag sang opisyal nga ang asod-asod nga pag-atake sang riding-in-tandem ang klaro nga mensahe nga wala sang dapat kabalak-an ang wala sang kaangtanan sa illegal nga druga.

Nagapati naman si Defensor nga indi ma-untat ang pag-atake sang riding-in-tandem samtang may nagatransaksyon sa gihapon sa illegal nga druga.

Pinaka-ulihi nga ginpatay ang barangay tanod sa Brgy. Calubihan, Jaro sang Oktubre 5.

SPECIAL TASK GROUP

Nagtukod na sang Special Task Group Defensor agud mag-imbestigar sa mga pag-atake sang riding-in-tandem.

Suno kay Defensor, ang imbestigasyon sang STG ang separado sa ginahimo nga imbestigasyon sang mga imbestigador sang natungdan nga mga police stations.

Ginpahayag sang opisyal nga wala nagahulag ang imbestigasyon sa mga police station rason gintukod ang STG.

Base sa report sang ICPO, naglab-ot na sa 5 ang gintiro-patay sang riding-in-tandem sugod sang nagligad nga bulan tubtob subong, Oktubre 7. (JoMaque)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply