(UPDATE) Maestro sa Alimodian nga gintudlo nagbutang sang spy camera sa CR sang classroom, ginpadal-an sang police sang sulat para sa pag-istoryahanay upod sa mga tagreklamo
Alimodian, Iloilo–Ginpadal-an na sang sulat sang police ang maestro nga gintudlo nagbutang sang spy camera sa CR sang iya classroom sa Sinamay National High School.
Suno kay PO2 Vivian Alingalan sang Women and Children’s Protection Desk sang Alimodian Police Station, gin-schedule man nila ang mga estudyante upod sa ila ginikanan nga maka-istoryahanay sila sang maestro.
Nangin dulaan ang maestro sang natukiban sang isa sa mga estudyante ang spy camera sang Oktubre 3. Posible nga wala nahibaluan sang maestro nga naka-on ang camera samtang ginaplastar sini sa sulod sang CR gani nga nakita gid ang iya itsura sang ginlantaw ang saved video sa memory card sang camera.
Desidido naman ang mga ginikanan sang estudyante nga pasakaan sang kaso ang maestro. (AGB)