Tigbauan, Iloilo — Gintanuman sang puno sang saging, balunggay, kapayas kag palma ang ginkabkab nga karsada sa Allera Street, Brgy. 8.

Suno kay Brgy. 8 Punong Barangay Elena Titular, mga pumuluyo niya ang nagpatanum sa mga trisikad driver sa karsada.

Second week sang Setyembre sang ginkabkab ang karsada suno kay Titular kag ginbayaan lang sang contractor.

Mas maayo na lang nga tanuman ang karsada suno kay Titular agud may anihon sila sa ginbayaan nga proyekto sang Edison Construction.

HUOL KAG PERWISYO

Nagawangal ang mga pumuluyo sa lugar suno sa punong barangay bangud sang perwisyo kag huol nga resulta sang ginkabkab nga karsada.

Magluwas sa indi na maka-agi dali dali ang mga salakyan, may mga trisikad drivers naman nga nag-ilinaway angut sa sitwasyon sang trapiko.

GINBALIKAN PERO LIWAT NGA GINBAYAAN

Ginbalikan sang contractor ang proyekto sang Oktubre 6. Sa pagpati sang punong barangay, gin-obra liwat sang contractor ang Php 24-Million proyekto matapos nagtrending ang post sang pumuluyo sa lugar natuhoy diri sang nagligad nga semana.

Apang ginsaway ni Engr. Panie Torrato sang Engineer’s Office sang LGU Tigbauan ang contractor suno kay Titular bangud manubo ang ginplastar nila nga pormas kag kulang man ang ila gintambak sa karsada.

Naglakat ang contractor suno kay Titular kasunod sini kag nagpahayag nga mangita na lang ang barangay official sang mabulos nga contractor.

Ginakuhaan sang Aksyon Radyo Iloilo sang official statement ang 1st District Engineerig Office sang Department of Public Works and Highways 6 apang wala pa sila nakahatag sang pahayag.

Nagpadala naman sang sulat si Tigbauan Mayor Suzette Alquisada sa DPWH 6 kag 1st DEO natuhoy sa problema sa proyekto. (JoMaque)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply