Iloilo City – Nanindugan ang tagdumalahan sang PROFRIENDS, developer sang Parc Regency , nga mapasugot lang sila nga inspeksyunon ang mga balay sang nagareklamo nga mga home owners kun may ipresentar na ang mga natungdan nga ‘valid basis’.

Ginpangayuan paathag sang Aksyon Radyo Iloilo si Ms. Dina Estocado, general manager sang PROFRIENDS- Iloilo sa gintumod niya nga ‘valid basis’ apang wala pa siya nakasabat.

Nanindugan man ang PROFRIENDS nga ginasunod nila ang ila construction specifications sa pag-obra sang mga balay sa subdivision.

GIN-INSPEKSYON NA SANG LGU

Gin-inspeksyon ni Engr. Ronilo Guillem, Municipal Engineer sang LGU-Pavia ang mga balay sang nagareklamo nga mga home owners sa Parc Regency Phase Q sang Setyembre 25.

Antes ang pag-inspeksyon, nagsapol anay ang mga home owners kag ang representante sang PRO FRIENDS upod man sa barangay officials sang Balabag kag sang mga engineers sang LGU-Pavia.

Wala nagpasugot sa amo nga sinapol ang mga engineers sang PROFRIENDS nga kutkuton ang porsyon sang balay sang pila ka mga home owners bangud ginpahayag maapektuhan ang stability sini.

Sa pihak sini, ginkutkot sang pila ka mga home owners ang porsyon sang ila balay agud ipakita kanday Engr. Guillem kag sa iban pa.

Tubtob subong (Oktubre 8, 12:30 P.M.), wala pa naka-issue sang official nga rekomendasyon si Engr. Guillem.

Una na ginreklamo sang mga home owners sa Parc Regency Phase Q nga madamo sang litik-litik ang pader kag salog sang ila mga balay. Dugang nila, mahuyang man ang pundasyon sang ila mga balay.

‘LGU SHOULD INVESTIGATE’

Ginpahayag ni Atty. Lyndon Juntilla, Assistant Regional Director sang Housing and Land Use Regulatory Board ukon HLURB VI nga dapat imbestigaran gilayon sang LGU-Pavia ang insidente.

Ginrefer sang HLURB sa LGU-Pavia ang reklamo sang mga home owners angut sa structure sang ila mga balay.

Nagpanugyan naman si Atty. Juntilla sa mga nagareklamo nga mga home owners nga magfile sang formal complaint batuk sa tagdumalahan sang PROFRIENDS.

Kalabanan sang mga ginpalab-ot nga concern sa HLURB 6 suno sa opisyal ang public assistance lang.

MADAMO PA

Una na ginreport nga nagpositibo sa Fecal coliform kag E. Coli ang water supply sa Parc Regency matapos ginpaidalum sa bacteriological test sang tagdumalahan sang PROFRIENDS.

Magluwas diri, ginreklamo man ang tagdumalahan sang PROFRIENDS nga nagbaligya na sang house unit sa Parc Q bisan wala pa sang License to Sell kag wala man nakahatag sang titulo sang duta sang mga home owners bisan nakafull payment na sila. (JoMaque)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply