Lalaki nga nagasakay sa jeep, gintiro patay sa Buenavista, Guimaras

Buenavista, Guimaras–Patay ang lalaki sang gintiro samtang sakay sa jeep nga may biyahe Calingao pa-Alibhon, Jordan.

Suno kay alyas Bords, driver sang jeep, nagsakay sa Old Poblacion ang biktima kag pag-abot sa Sitio Carig-on, Agsanayan, Buenavista, nagpara ang duha ka lalaki nga sakay sa motorsiklo.

Ginkilala ni Senior Inspector Jeffrey Ferrer, hepe sang Buenavista Police Station ang napatay kay Nathaniel Jover y Montaño, alias “Boganoy,” 32-anyos, single kag residente sang Brgy. San Fernando, Buenavista.

Ginpahayag nga may tatlo na ini ka ginpatay kag ginakabig man nga High Value Target drug personality.

May anum ka pilas ang biktima sa likod kag dughan.

Ginlaragway sang driver ang mga suspetsado nga hamay-hamay kag naka-bonnet. Madasig ang mga ini nga nagpalagyo matapos ang krimen.

Wala na gindala pa sa ospital ang biktima suno kay Bords bangud nagkisi-kisi na lang ini kag nag-untay matapos siya gintiro. (AGB)