17 gindakup sa pagpa-upas sang damang sa Leganes

Leganes, Iloilo–17 ka nagapa-upas sang damang ang ginpangdakup sang police sa Barangay Lapayon, Leganes kahapon sang hapon, Oktubre 11.

Suno kay Senior Inspector Dadje Delima, hepe sang Leganes Police Station, nakabaton sila sang impormasyon nga may nagapa-upas sang damang kag may mga pangayaw pa kag dalagku ang pusta gani ila gin-operate. Nakapalagyo ang tag-iya sang balay sa diin ginahimo ang pa-upas.

Na-recover sang police ang mga damang, mga box, lamesa kag stick nga ginapa-awayan sang mga damang kag ang P32,080 nga cash.

Magapangatubang sang kaso nga illegal gambling ang mga nadakpan. (AGB)