Hamtic, Antique– Tatlo ang kumpirmado nga patay samtang pito ang pilason matapos nahulog sa pil-as ang Ceres Bus alas 9:45 kagab-i, Abril 5.

Halin sa Iloilo City ang bus kag padulong sa San Jose, Antique sang nahulog sa pil-as nga ginabanta nagadalum sang 100 ka tapak sa Barangay Igbucagay.

Wala sang suga sa area kabangdanan binudlayan pa ang mga rescue teams nga nagresponder sa lugar.

Ginkilala ni Mr. Moises Flores, admin officer sang Vallacar Transit, nagapanag-iya sang mga Ceres buses, ang isa ka napatay kay Earl Aron Omanio, 18-anyos sang Barangay Boroc-Boroc, Belison, Antique kag ginpahayag nga bag-o lang nag-graduate sa senior high school sa John B. Lacson Maritime University.

Patay man ang iya iloy nga si Vivien, manunudlo sa Belison National High School.

Patay man ang isa pa gid ka pasahero nga si Evangelyn Chicano sang Guinbangaan, San Jose.

Lakip naman sa mga napilasan nga pasahero ang amay ni Earl nga si Edwin kag ang iya utod nga si Hans Gabriel.

Pilason ang isa pa gid ka ginpahayag bag-o man graduate sa John B. nga si John Lorenz Sanchez sang Hamtic.

Ginkilala ang iban pa gid ka pilason nga sanday Lorie Mae Onera, 19-anyos, estudyante sang University of Antique kag Jenine Chicano, 26-anyos.

Suno kay Flores, “second to the last” trip ang bus nga naaksidente.

Ginpahayag nga madasig ang padalagan sang driver nga si Ramon Abellar sa likuon nga parte sang barangay. Ginkilala ang iya konduktor kay Ervic Nepomuceno.

Suno kay Police Major Adolfo Pagharion sang Hamtic Police Station, napamangkot nila ang mga drivers sang vans nga gin-overtake-an sang driver kag nagpabutyag sila nga tuman ka dasig ang pagmaneho ni Abellar sang bus.

May 10 ka sakay ang bus.

Suno kay Flores, sang ila ginlantaw ang nahulugan sang bus, may duha pa gid ka salakyan nga nahulog sa pil-as sadto nga wala pa makuha tubtob subong.

May impormasyon nga masobra na 30 ka salakyan ang nahulog sa pil-as lakip ang Family Express Bus nga nahulog sang 1988 sa diin patay ang 31 tanan ka sakay. (JoMaque)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply