Tatlo ka mga kandidato sa pagka-vice mayor sa syudad, lunsay nagplastar sang ila mga plataporma kag plano sa Candidates’ Forum sang Aksyon Radyo Iloilo kag UPV

Iloilo City — Gin-atubang kag ginsabat sang mga nagapadalagan vice mayor sa syudad sang Iloilo sa midterm elections ang mga pamangkot sa ila sa Candidates’ Forum sang Aksyon Radyo Iloilo kag UP Visayas kahapon, Abril 10. Wala naman nakatambong si incumbent Vice Mayor Jeffrey Ganzon.

Nagtambung sa forum sanday Mr. Constancio Caro, Councilor Plaridel Nava kag Councilor R. Leone Gerochi.

Sa opening statement pa lang, ginpadayaw na sang mga kandidato ang ila mga plataporma kag programa.          

Suno kay Caro, nagpadalagan siya bisan ordinaryo lang siya nga tawo bangud luyag niya kag sang iya grupo nga pamatukan ang illegal drugs, corruption kag kriminalidad kag iduso ang federalismo nga panggobyerno.

Gintanyag naman ni Nava ang iya kaugalingon bangud kinahanglan sang syudad sang vice mayor nga may performance kag political will kag cause-oriented.

Suno sa konsehal, masobra isa ka libo kag ordinansa kag resolution ang iya napasar, gintaya niya ang kaugalingon sa away kontra illegal drugs, ginkondenar niya ang corruption kag ginpakigbato ang kinamatarung sang mga konsumedor batuk sa indi ensakto nga pagpalakat sang PECO.

Suno naman kay Gerochi, kinahanglan sang syudad sang lider nga innovative kag problem solver; nagahatag sang maayo nga serbisyo kag wala lang nagadiskurso. (JoMaque)