Iloilo — Nag-surrender kahapon sang kaagahon, Abril 13 ang duha sa tatlo ka preso nga nakapalagyo sa custodial facility sang Sta. Barbara Police Station sang Abril 11 sang kaagahon.

Balik sa prisuhan sanday Reniel Sellarico, 25 sang Talanghauan, Sta. Barbara nga may kaso nga rape kag Mark Arca, 20 sang Barasalon, Janiuay nga may kaso nga murder.

Ginapangita naman ang isa pa ka preso nga si Bhrix Sarin, 19 sang Caningay, Candoni, Negros Occidental nga may kaso nga pagpangawat kag ginatudlo mastermind sa plano nga pagpangawat.

Gin-athag ni Sellarico nga wala sila kuntani plano nga magpalagyo ni Arca pero ginpilit sila ni Sarin sang nabuksan niya ang liyabe sang prisuhan gamit ang alambre.

Suno kay Sellarico, nag-agi sila sa likod nga parte sang police station paagi sa pagtaklas sa pader. 

Nagpanago sila sa kawayanan sa Barangy Duyan-Duyan tubtub nagdesisyon si Sellarico nga mapauli sa ila balay sa Talanghauan.

Biernes sang gab-i, Abril 12 sang naghambal si Sellarico sa iya asawa nga ma-surrender upod kay Arca.

Napamat-ud naman suno sa iya si Sarin nga indi siya mag-surrender buhi man ukon patay. (JoMaque)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply