Lambunao, Iloilo — Patay na sang nasapwan sa iya kwarto ang 42 anyos nga lalaki nga ginkilala kay Norberto Robles sang Purok 3, Barangay Pungsod, pasado las 3 kahapon sang hapon, Abril 21.

Ang utod ni Norberto ang nakasapo sa iya nga nagahapaon na lang sa iya katre.

Suno kay Police Major Rene Obregon, hepe sang Lambunao Police Station, indi mabuksan ang pwertahan sang kwarto ni Norberto gani nagsaka ang iya utod sa kisame agud malantaw siya sa sulod sang iya kwarto.

Nakit-an sang utod nga nagapalanggit-um si Norberto kag wala na nagahulag.

Gilayon nga nagresponder ang mga personnel sang Municipal Risk Reduction and Management Office kag mga pulis kag gindala sa ospital ang lalaki apang gindeklarar nga napatay.

Wala sang patimaan nga ginpatay ang lalaki.

Sa inisyal nga imbestigasyon sang kapulisan, posible na-cardiac arrest ang lalaki ukon gin-atake sang hypertension.

Ginabanta sa indi magnubo sa walo ka oras nga napatay ang lalaki antes nakit-an.

Naga-isahanon nga naga-istar sa ila balay si Norberto bangud nagatrabaho sa abroad ang iya asawa kag ang iya mga bata ang ara naman sa ila nga lola.

Ginahulat pa sang kapulisan kun ang desisyon sang pamilya kun ipa-autopsy ang bangkay ni Norberto. (JoMaque)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply