Retired police nga ginhingadlan ni Pres. Duterte nga may kaangtanan sa illegal drug trade, ginkuha sang armado nga mga lalaki sa Bacolod City; Retired police, wala gihapon makit-an

Bacolod City (UPDATED)—Wala gihapon makita sang mga otoridad si Retired Police Major Lito Pirote nga ginpahayag ginkuha sang mga armado nga mga lalaki sa Metro Inn Hotel sa Brgy. 7, Bacolod City sang Abril 19 sang aga.

Suno kay Police Staff Sergeant Rommel Beato, imbestigador sang Police Station 2 sa Bacolod City Police Office, nanginpadlos pa si Pirote apang nadala sang mga suspetsado nga may short kag long firearms, naka-face mask, naka-bonnet, naka-bullet vest kag may dala sang tubo ukon baseball bat.

Nagpamahaw pa si Pirote upod sa iya bata kag kay Atty. Randy Barring nga upod man sa iya pamilya sa amo nga hotel antes ang insidente.

Si Atty. Barring ang legal counsel ni Pirote angut sa kaso nag ginpasaka sa iya sa Department of Justice angut sa 11-Billion shabu shipment controversy sa Bureau of Customs sang 2018.

Suno kay Police Captain Leo Estopa, hepe sang Police Station 2, gin-updan ni Pirote si Atty. Bareng nga nagcheck-in sang Abril 18 sang aga sa amu nga hotel.

Ginpahayag nga gindis-armahan sang kapin 5 ka mga suspetsado ang gwardya sang hotel kag ginpahapa ang mga customer. Ginsakay sang mga armado nga kalalakihan si Pirote sa puti nga van nga may licensed plate nga YS 4514 kag nagpadulong sa direksyon sang North.

Ginpahayag ni Estopa nga posible nagbato si Pirote bangud may tinulo sang dugo nga nakita sa hotel.

Si Pirote ang na assign sadto sa National Headquarters sa Camp Crame sa Anti Illegal Drugs Group antes ginhingadlan ni Duterte sang Oktubre, 2018 nga may kaangtanan sa illegal nga druga. Una na na-angut si Pirote sa P11 Billion drug shipment sa Bureau of Customs.

‘INDI INI DRAMA’

Nanindugan naman ang pamilya ni Pirote nga indi ‘drama’ ang pag-abduct sa retired police.

Suno kay alyas Gel, bata ni Pirote, wala dile nakahibalo kun sa diin ukon sin-o nag nag-abduct sa ila amay.

Ginpahayag wala sang nabaton nga death threats ukon may nakasuay ang ila amay antes ang incidente.

Nagapati naman si alyas Gel nga may kaangtanan sa anay obra sang ila amay ang pag-abduct sa iya.

Sa kapin 30 ka tuig nga pagserbisyo ni Pirote sa PNP kag PDEA, dako ang posibilidad nga may nabungguan siya nga drug personality suno kay Gel.

‘DISMISSED NA ANG KASO’

Gindismiss na sang Ombudsman ang ginpasaka nga kaso sang PDEA batuk kay Pirote suno kay Gel sang Abril 15, apat ka adlaw antes gin-abduct si Pirote.

Matandaan, lakip si Pirote sa ginpasakaan kaso sang PDEA angut sa shabu shipment controversy.

Wala pa nakahatag sang detalye ang pamilya Pirote kun ano nga kaso ang gindismiss.

‘IBALIK NIYO LANG SIYA NGA BUHI KAG SAFE’

Naga-apelar ang pamilya Pirote sa nag suspects nga ibalik ang retired police nga buhi kag safe.

Nag-apelar man si Gel kay Presidente Rodrigo Duterte kag sa iban pa nga mga ahensiya sang gobyerno agud mas mapadasig ang imbestigasyon.

Nagapanawagan man ang pamilya Pirote sa tanan nga mahimo makabulig sa ila agud mahibaluan ang status sang ila amay. (JoMaque)