2 senior citizens, arestado matapos nagpalupok sang pusil sa Smallville Complex sa Mandurriao

Iloilo City — Arestado ang duha ka senior citizens matapos nagpalupok sang pusil sa atubang sang resto bar sa Smallville Complex sa Mandurriao kaina sang kaagahon, Abril 23.

Gin-aresto sanday Gerolen Alave, 63 anyos sang Arevalo kag Serafin Pendon, 75 sang Pototan matapos ginreklamo sang driver sang GDR taxi nga si Welmer Cadano, 33 anyos, nga nagtiro sang windshield sang iya taxi.

Suno kay Cadano, na-atrasan sang pick-up nga ginamaneho ni Alave ang likod nga parte sang iya taxi kabangdanan nagupi.

Naguwa suno sa iya si Pendon sa front seat nga may bitbit nga pusil kag ginpahayag gintiro ang taxi ni Cadano.

Napilitan man maguwa sa pick-up sanday Alave kag Pendon matapos ginbalabagan sang isa pa ka unit sang GDR taxi para indi sila makapalagyo.

Preso ang duha sa Mandurriao Police Station samtang narecover naman ang pusil nga gingamit ni Pendon.

Gintinguhaan sang Aksyon Radyo Iloilo nga ma-interview ang mga arestado apang nagpamalibad.

Nagapamalibad man sila nga magpakuha sang ila pictures. (JoMaque)