Iloilo — Ginplastar sang mga nagapadalagan mayor sa Pavia ang ila mga prayoridad sa Candidates’ Forum sang Aksyon Radyo Iloilo kag UP Visayas kahapon, Abril 22.        

Suno kay retired Police Officer Ray Delos Santos, ipatuman niya ang mga ordinansa sa trapiko kag hatagan incentives ang indi pasaway nga mga drivers; hatagan sang dugang nga incentives ang mga tanod kag hatagan man importansya ang palibot kag suba paagi sa pagdula sang illegal quarry.

Ginpabutyag naman ni Vice Mayor Raymund Gumban nga iduso niya ang pagpadayon sang Philhealth sa pumuluyo kag pag-implementar sang comprehensive drainage plan kag comprehensive land use plan, paghatag sustainable allowance sa mga senior citizens kag paghimo sa taga-Municipal Social Welfare and Development Office nga epektibu.

Unahon naman ni SB Member Luigi Gorriceta ang waste management kag naghingyo sa pumuluyo nga magbulig sa waste segregation, pagsolbar sa problema sa trapiko paagi sa pagpa-seminar sa mga traffic enforcers sa LTO kag pagtutok sa edukasyon paagi sa pagdugang sang school buildings.

Sa pamangkot kon paano mabuligan ang mga pigado, ginpahayag ni Delos Santos nga himuon niya ang tanan agud indi dali-dali ma-convert ang mga humayan sa subdivision.

Dapat naman suno kay Gumban nga hatagan sang palangabuhian ang mga pigado.

Ginaduso naman ni Gorriceta ang pagpreparar sa kabataan paagi sa pagsuporta sang ila edukasyon. (JoMaque)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply