Sara — Nagreklamo si Sara mayoral candidate retired General Jon Aying nga nagmaoy ang punong barangay sang Preciosa, Sara pagkatapos sang ila caucus sang Abril 29.

Suno kay Aying, nagsinggit singgit pa si Preciosa Punong Barangay Ronnie Dorde nga wala siya ginrespeto apang ginsaway sang iya asawa.

Dugang diri, ginpahayag gingarit garit man sang mga barangay tanod ang nabilin nga mga supporters ni Aying sa lugar.

May tensyon sa tunga sang mga supporters ni Aying kag sa mga barangay tanod apang natahaw bangud nagresponder sa lugar ang mga pulis.

Nagapati si Aying nga nagmaoy si Dorde bangud madamo ang nagtambong sa ila caucus lakip ang himata kag ginikanan sang punong barangay.

‘WALA AKO NAKA-INOM’

Nanindugan naman si Dorde nga wala siya naka-inom kag nagmaoy pagkatapos sang caucus sang grupo ni Aying.

Gin-ako naman sang punong barangay nga nakahambal siya sa mga supporters ni Aying nga wala nila siya ginrespeto.

Ginhatagan sang permit ang grupo ni Aying sa paghiwat sang caucus suno kay Dorde apang wala sila nakalisensya nga mahigot sila sang lubid sang tent sa ring sa basketball court.

‘MAY PUSIL’

Nagreklamo naman si Dorde nga nagkuha sang pusil ang supporter ni Aying nga si alyas ‘Amo’ apang gilayon nga nakita sang mga pumuluyo sa ila barangay kag ginlagas ini apang nakapalagyo.

Dugang niya, nahulog man ang pusil sang wala pa nakilala nga driver ni Aying antes sang caucus.

Desidido si Dorde nga magpasaka sang kaso batuk sa mga supporters ni retired General Aying.

Ginpanginwala naman ni Aying ang mga akusasyon ni Dorde. Plano ni Aying nga ma-istorya ang punong barangay pagkatapos sang eleksyon. (JoMaque)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply