Iloilo City — Ginkunfirmar ni Metro Iloilo Water District Office-In-Charge Amarylis Josephine Castro nga nagkuha sang water supply ang city government para i-deliver sa mga barangay sa syudad nga apektado sang water crisis.

Suno kay Castro, nagtawag sa iya si City Administrator Atty. Hernando Galvez sang nagligad nga semana kag nagpahibalo nga makuha sila sang dugang nga water supply.

Ginpahayag ni Galvez nga kinahanglanon gid sa pila ka mga barangay ang tubig rason nagbakal ang city government bisan wala pa napirmahan ang ila Memorandum of Agreement sang MIWD.

Fire truck sang Bureau of Fire and Protection ang gingamit sa pagkuha sang tubig sa fire hydrant sang MIWD sa Barangay Tabuc Suba, Jaro.

‘Disadvantageous’

Ginpabutyag ni Castro nga disbentaha sa city government ang pagbakal nila sang dugang nga water supply.

Suno kay Castro, P80 cubic/meter ang ila baligya sa city government sa amo nga transaksyon, tuman ka taas ipaanggid sa P23 cubic/meter kun mapirmahan na ang ila MOA.

Indi pa makahatag sang quantity ukon balor sang transaksyon si Castro sa subong bangud kinahanglan nga may approval sang Board of Directors.

Wala pa man nakahatag sang kopya sang MOA si Galvez sa MIWD.

‘Nagdeliver na’

Una na ginkunfirmar ni Barangay Ortiz, City Proper Barangay Kagawad Marites Magno nga nag-deliver ang BFP sang tubig sa ila sang Abril 27.

Suno naman kay Maria Clara, City Proper Punong Barangay Rizalino Salazar, may ginplastar nga water tank sa ila barangay ang ‘leader’ ni mayor Joe Espinosa apang wala pa sang may na-deliver nga tubig tubtob kahapon, Mayo 2.

Una na ginpahayag ni Galvez nga wala siya nakahibalo nga gina-deliver na ang tubig sa pila ka mga barangay sa syudad.

Wala pa nakahatag sang dugang nga pahayag si Galvez angut sini.

Nangin kontrobersiyal ang pagdeklarar sang state of calamity sa syudad bangud sang water crisis sang nagligad nga semana matapos ginkwestyon sang pila ka mga konsehal ang quorum sa session kag basehan sa deklarasyon. (JoMaque)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply