Miagao, Iloilo –Nasiplatan ang 12 ka armado nga mga lalaki sa Barangay San Jose kahapon, Mayo 9.

Suno kay Lieutenant Colonel Joel Benedict Batara, commanding officer sang 61st Infantry Battalion sang Philippine Army, mga miembro sang New People’s Army (NPA) ang armado nga kalalakihan.

Nagpangkakas sang mga campaign materials sang mga kandidato ang mga armado.

Ginpadulongan sang mga soldado ang lugar pero wala naabtan ang armado nga grupo.

Kalabanan sa mga nakit-an nga lalaki suno kay Batara, mga teenagers kag indi kilala sang mga residente.

Labe pa nga ginhugtan sang mga soldado ang seguridad sa nasambit nga lugar suno kay Batara kasunod sang pagpanaug halin sa bukid sang mga NPA members kag agud masiguro ang matawhay kag malinong nga May 13 midterm elections.

Gintinguhaan sang Aksyon Radyo Iloilo nga makuhaan sang statement ang hepe sang Miagao Police Station apang wala siya nakahatag.

Ang Barangay San Jose, ginabanta 12 kilometros ang kalayuon sa poblacion sang Miagao.

‘MAS MABASKUG NGA SECURITY MEASURES’

Nagmandu si Police Regional Office 6 Director Police Brigadier General John Bulalacao sa mga pulis nga mas pabaskugon ang ila security measures matapos ang hilway nga paglakat sang armado nga mga ginapatihan miembro sang New People’s Army sa karsada sang Barangay San Jose.

Suno kay Iloilo Police Provincial Office Spokesperson Police Captain Antonio Monreal Jr, nagmandu si Bulalacao nga mas pabaskugon pa ang ila mga security measures paagi sa pagpabakod sang ila mga defense mechanism sa ila estasyon ukon mga assistance centers.

Masobra 11,000 ka mga pulis ang gin-deploy sang PRO 6 sa rehiyon para sa eleksyon.

Gindumilian naman ang mga pulis sa paggamit sang ila athletic uniform suno kay Monreal matapos nadiskubrehan nga pila sa mga ginapatihan rebelde nga nagpakita sa Miagao ang nagasuksok sang athletic uniform nga kasubong sa iya sang mga pulis.

Ginpakamaayo nga indi anay paggamiton ang athletic uniform suno kay Monreal bangud posible ini maggamit sang mga rebelde ilabi nga mahimo ini mabakal sa mga merkado.

‘EXTRA VIGILANT’

Nagpanawagan naman si Monreal sa mga pulis nga mangin extra vigilant angut sa nagahilapit nga eleksyon.

Posible taktika lang sang mga rebelde ang pagpakita sa nabukid nga bahin sang Miagao rason importante nga preparado ang mga pulis sa tanan nga ti-on.

Nagapadayon naman ang monitoring sang mga pulis kag soldado sa movement sang mga rebelde.

Gintinguhaan sang Aksyon Radyo Iloilo nga makuhaan sang pahayag ang hepe sang Miagao Police Station apang wala siya nakahatag. (JoMaque)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply