Iloilo City — Gintawag ni Police Regional Office 6 Director Police Brigadier General John Bulalacao nga malisyoso kag iresponsable ang mga nag-post sa social media sang akusasyon nga private armed group ang mga pulis sang mga Defensor sa Iloilo.

Suno kay Bulalacao, wala sang pamatuod ang nag-post nga private army ang police sang pulitiko.

Kon nangin istriko ang mga pulis sa pagbantay, ginpabutyag ni Bulalacao nga kabahin lang ini sang ila obligasyon nga siguraduhon nga patas kag wala sang dinayaay ang eleksyon sang Mayo 13.

Nakahanda naman si Bulalacao nga atubangon ang anuman nga reklamo nga ipasaka batuk sa iya.

Buligan man suno sa iya sang pamunuan sang Philippine National Police ang mga pulis kon may magpasaka sa ila sang kaso sa ila ginhimo nga mga operasyon angut sa midterm elections.

AKUSASYON NI CONG. BIRON

Sa interview kay Congressman Ferj Biron sa Aksyon Firingline kagab-i, Mayo 15, gin-akusaran niya ang mga pulis nga ‘private army’ ni Governor Arthur Defensor nga gingamit sa election.

Suno kay Biron, ginpasundan ang mga lideres sang iya partido kag ginpahayag nga ‘ginpigos’ ang iya mga kaalyado nga pulitiko antes ang election.

Ginpahayag sang kongresista nga indi maakusaran ang ila grupo nga poderoso bangud wala sila sa gahum. (JoMaque)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply