Jaro  — Ginbuyagyag sang hepe sang Jaro Police Station nga miembro sang ‘organized gang’ nga responsable sa pagpangawat kag pagpanghold-up sa syudad ang magtiyo nga gin-abduct kag nasapwan patay sa Barangay Balabago, Jaro sang Martes, Mayo 21.

Suno kay Police Captain Eduardo Siacon Jr., ang wala ginhingadlan nga gang sang magtiyo ang gintukod sang 2010 kag may mga miembro sa kada distrito sa syudad.

Ginkunfirmar sang biktima sang pagpanghold-up sa Mandurriao sang nagligad nga semana suno kay Siacon nga ang tiyo nga si Jemrode Eribal, 22-anyos sang Barangay San Isidro, Jaro, ang naghimo sang krimen.

Una na ginpahayag ni Police Major Mark Evan Salvo, hepe sang Lapaz Police Station, nga gin-imbitar man nila ang isa pa gid ka biktima nga si Tristan Zacary Eribal, 19-anyos, kag ang iya abyan matapos na-angut sa pagpangwat apang na-clear man kag ginpapuli.

Ang ‘gang’ sang magtiyo ang ginpahayag responsible man sa pagbuno-patay kay Barangay Our Lady of Fatima, Jaro barangay tanod Jenny Francisco sang Mayo 18 suno kay Siacon base sa ila imbestigasyon.

‘INITIATION ANG PAGPAMUNO’

‘Organized’ ang pag-operate sang ‘gang’ sang magtiyo suno sa police kag kabahin sang ila initiation ang pagpamuno.

Una nga quarter subong nga tuig sang nangin aktibo sa ‘gang’ si Jemrode suno kay Siacon.

Nagapati man siya nga kabahin man sang amo nga ‘gang’ si Tristan bangud halos miembro sini ang iya mga abyan.

Una na ginpahayag ni Caingin, Lapaz Punong Barangay Rene Firmeza nga maayo nga pumuluyo sa ila barangay si Tristan apang indi malikawan nga magbarkada.

‘WALA SANG GANG’
Nagdepensa naman ang iloy ni Jemrode nga si Rowena Eribal sa pahayag sang mga pulis.

Suno sa iya, wala sang gang ang iya bata kag kun may mga abyan man, lunsay sila tumandok sa ila barangay.

Nagpanawagan naman ang iloy sa mga pulis nga untatan na ang pagpatuto sang malain nga istorya batuk sa iya bata bangud napatay na.

Wala pa nakahatag sang pahayag ang pamilya ni Tristan angut sini.

‘WALA PA SANG LEAD SA MGA SUSPECTS’

Wala pa sang lead ang Jaro police sa identities sang mga nag-abduct kag nagpatay sa magtiyo apang nagapati si Siacon nga may kaangtanan ini sa ila ‘gang.’

Posible nagtimalos ang mga nahalitan sang natungdan nga ‘gang’ suno kay Siacon.

Ginpahayag ginabaligya sang amo nga ‘gang’ ang makawat nila nga mga gamit agud may ibakal naman sang illegal nga druga.

Una na ginpahayag ni Iloilo City Police Office Director Martin Defensor Jr nga tatlo ka grupo sang mga drug surrenderers ang gina-imbestigaran nila may kaangtanan sa asod-asod nga pagpanghold-up sa syudad sang nagligad nga semana. (JoMaque)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply