Babaye, ginhal-id sa higad sang karsada sa Dumangas, nabaklid kag may duct tape sa kamot kag baba

Dumangas, Iloilo — Ginhal-id ang babaye sa higad sang karsada sa Sitio Buol, Barangay Talusan (and not Sapao as earlier reported), Dumangas pasado las sais subong nga aga, Mayo 28.

Wala sang malapit nga pamalay sa area.

Ginhingagaw dala sa Dumangas District Hospital ang babaye.

Suno kay Police Major Jogen Suegay, hepe sang Dumangas Police Station, nabaklid ang mga kamot sang biktima nga ginhigtan sang duct tape.

May duct tape man ang iya baba.

Nagpangayo pa sang bulig ang babaye sa mga tawo nga una nagresponder sa lugar kag nakahambal nga gintiro siya.

Napatay sa ospital ang babaye bangud sang pilas sa dughan base man sa kumpirmasyon ni Suegay.

IDENTITY

Pasado alas-siete subong nga gab-i, gin-identify ni Major Suegay ang biktima kay Marlyn Serdeña y Deluda, 29 sang Brgy. San Miguel, Buenavista, Guimaras.

Suno kay Suegay, ang iloy mismo ni Serdeña ang nagconfirmar sang identity.

Ginbuyagyag man ni Suegay nga may records sa isa sa mga police stations sa Iloilo City si Serdeña pero indi niya madetalye bangud padayon ang ila imbestigasyon.

Posible suno sa hepe nga sa lugar mismo sa diin nasapwan si Serdeña gintiro ang biktima.

Nagpanawagan si Major Suegay sa mga may ihibalo sa krimen nga maghatag impormasyon sa police station. (AGB)