Back hoe, nahulog sa suba sa Passi City; driver, nalumos patay

Passi City, Iloilo — Nalumos patay ang back hoe operator sa Barangay Gemat-y, Passi City kaina sang aga, Mayo 28.

Ginkilala ang napatay kay Efraim Gumban, 57 sang Siniba-an, Dingle.

Suno kay Police Staff Sergeant Roderick Laride sang Passi City Police Station, naga-ubra sa ginakay-o nga karsada si Gumban. Nagtabok ini sa suba sang nahulog sa madalum nga parte gani nalumos.

Suno pa kay Laride, gindala sa Don Valerio Palmares District Hospital si Gumban apang gindeklarar nga dead-on-arrival.

Sang Abril 10 subong nga tuig lang, napatay man sa amo nga area si Larry Despi sang Alimono, Passi City matapos nalumos sang nahulog sa suba ang iya ginamaneho nga back hoe. (AGB)