Carles, Iloilo — Patay ang 58-anyos nga lalaki matapos nabun-an sang screw driver sa Sitio Sulod, Cawayan, Carles kahapon, Mayo 28. 

May duha ka pilas si Francisco Deximo nga tumandok sang Bolilao, Dumangas kag temporaryo nga naga-tiner sa nasambit nga lugar. 

Suno kay Police Master Sergeant Rufino Jordan sang Carles Police Station, suspek sa krimen si Benjamin Billones, 32 anyos nga residente sang Cawayan.

Antes natabu ang insidente, nagainom-inom ang duha kag sang nahubog, posible nga wala nag-intindihanay.

Una nga ginlampusan sang biktima sang botelya ang suspek. Nagkuha naman sang screw driver ang suspek kag ginbuno ang biktima.

Posible suno kay PMS Jordan nga naigu ang tagipusuon sang biktima nga gintunaan sang iya kamatayon.

Preso ang suspek sa Carles Police Station kag posible mangatubang sang kaso nga murder. (AGB/AS)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply