Pototan, Iloilo — Nagreklamo ang 26-anyos nga preso sa Pototan Police Station nga ginkastigo siya sang mag-utod nga pulis sang gindakop siya sa Naric Avenue Street, Ledesma Ward sang Mayo 27 , pasado las dyes sang gab-i.

Suno sa tagreklamo nga si Emmanuel Adoracion, nagalakat siya upod sa iya asawa kag iban pa nga mga himata pakadto sa police patrol matapos naangut sa komosyon sang ginsugata siya kag hinali lang ginsulok-sulok ni Police Staff Sergeant Erwin Acosta nga pumuluyo man sa lugar.

Naka-inom kag wala naka-uniform ang 39-anyos nga pulis sang ginpahayag ginsumbag niya ang tagreklamo kag ginpamangkot kun ano ang ginhimo niya sa iya ihado.

Antes gindakop si Adoracion, ginpahayag ginsumbag kag ginbuno niya si Donnil John Peñaflorida, 25-anyos, apang wala naigo.

Nakibot naman si Adoracion sang hinali siya ginbalabagan sang motorsiklo ni Police Staff Sergeant Ravelo Acosta Jr., utod sang una na ginreklamo nga pulis, kag makaduha ka beses man nga ginsulok-sulok.

Ginpahayag ginsumbag pa ni Erwin ang tagreklamo sa ulo sang nakasakay na siya sa police patrol.

Nag-untat lang ang mag-utod nga pulis sa pag-atake sa tagreklamo matapos sila ginpahayag ginpunggan sang iban pa nga nagresponde nga mga pulis.

‘IYA INA ALEGASYON’

Lunsay naman ginpanginwala sang mag-utod nga pulis ang akusasyon batuk sa ila ni Adoracion.

Suno kay P/SSGT Erwin, bisan off-duty siya sang amo nga ti-on, nagresponde siya sa komosyon bangud malapit lang sa lugar ang ila balay.

Dugang niya, nagbulig lang siya sa pagsaway sa magtimbang nga kampo kag sa ila mga himata nga yara man sa lugar.

Gin-ako naman ni P/SSGT Erwin nga ihado niya ang manghod sang ginsumbag ni Adoracion.

Suno naman kay P/SSGT Ravelo, una siya nga nagresponde sa lugar matapos nakabaton sang impormasyon angut sa komosyon.

Ginpanginwala ni P/SSGT Erwin nga ginsulok-sulok niya si Adoracion apang gin-ako nga posible nawahig niya ang himata sang preso sang gina-aresto niya kag ginadala sa police patrol.

‘GINBUTONG BUHOK KO KAG GINLAMPOS’

Magluwas kay Adoracion, nagreklamo man ang iya 20-anyos nga manghod nga si Sarralyn matapos ginpahayag gin-uyatan sa buhok kag ginlampos sa duta ni P/SSGT Ravelo.

Antes ang insidente, ginpabutyag sang manghod sa mga pulis nga indi lang pagsakiton ang iya magulang bangud maupod man sa ila.

Desidido nga magpasaka sang kaso sa National Police Commission ukon NAPOLCOM 6 ang mag-utod.

‘GINA-IMBESTIGARAN NA SANG IPPO’

Ginkunfirmar ni Iloilo Police Provincial Office Director Marlon Tayaba nga gin-imbestigaran na niya ang akusasyon sang preso.

Ginpahayag naman ni Tayaba nga kinahanglan maggamit sang pwersa sang pulis sa pagdakop sa ila mga subject persons.

Makabig obstruction of justice ang ginhimo sang mga himata ni Adoracion suno kay Tayaba bangud ginapunggan nila ang pagdakop sa ginareklamo.

‘WALA GILAYON GINPA MEDICAL CHECK-UP’

Nagreklamo man si Adoracion nga wala siya gilayon ginpa-medical check up sang gindakop sang mga pulis bisan naghingyo nga magpa-ospital matapos nagpalanakit ang iya lawas.

Suno kay Adoracion, ginhambalan niya ang nakaduty nga pulis apang wala man gin-aksyonan ang ila hingyo.

Nagmuno man ang himata ni Adoracion sa nakaduty nga pulis apang liwat nga napaslawan.

Subong nga adlaw lang, Mayo 31, sang ginpamedical check-up si Adoracion matapos ginpalab-ot ang concern kay Police Major Ronnie Brillo, hepe sang Pototan Police Station.

Suno kay Brillo, wala nakahambal sa iya si Adoracion nga luyag niya magpacheck up.

Dugang niya, wala man sang may nakita nga injury sa arestado rason wala gilayon gindala sa ospital.

Sandig sa Rule 19 sang PNP Operational Procedures, lakip sa general policy sa pagbook sang mga arrested persons ang pagpaidalum sa medical examination sa suspect ukon ginareklamo.

Nag-issue na sang memorandum si Major Brillo sa mag-utod nga pulis kag ginapa-eksplikar sa reklamo batuk sa ila.

Naghimo naman sang pre-charge investigation sa mag-utod suno kay Brillo.

Preso si Adoracion matapos ginpasakaan sang attempted murder sang Mayo 28. (JoMaque)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply