Bangkay sang babaye nga ginhal-id sa Dumangas, gindala na sang iya pamilya sa Guimaras

Iloilo — Nakuha na sa punerarya sa Dumangas ang bangkay ni Marlene Serdeña kag nabalik sa ila sa Barangay Getulio, Buenavista, Guimaras.

Si Serdeña ang babaye nga ginhal-id sa kilid sang karsada sa Barangay Talusan, Dumangas sang Mayo 28 sang aga kag napatay sa ospital bangud sang pilas sang pagkatiro sa dughan.

Suno kay Police Senior Master Sergeant Kim John Banson, imbestigador sang Dumangas Police Station, ginpauli ang bangkay ni Serdeña sang Mayo 31.

Natawgan ni Banson ang bana sang biktima nga nagatrabaho sa Palawan kag ginabilin na sa iya ugangan ang paghikut sang tanan.        

Una na nga ginpahayag ni Marilou Deluda, iloy ni Serdeña, nga indi na sila interesado nga magpasaka sang kaso.

Natukiban nga madamo sang nagpa-blotter sa biktima sa Molo Police Station nga ginkuhaan niya sang kwarta.

Nagpa-blotter man ang biktima isa ka oras antes siya nasapwan nga may pamahug siya nga nabaton halin sa isa sa mga nag-report sa iya sa police. (JoMaque)