Iloilo – Suportado sang iya pamilya ang masahista nga nagreklamo nga ginhimuslan sang guwardya nga na-assign sa Provincial Capitol.

Suno kay alyas Kap, desidido ang iya manghud nga ipursige ang kaso kag ginasuportahan ini sang iya bilog nga pamilya.

Suno pa kay alyas Kap, ginsugid sang iya manghud nga ginhimuslan siya ni Prison Guard II Roen Ledesma sa opisina ni Board Member Nielo BongBong Tupas sa 6th Floor sang Kapitolyo sang Mayo 25 sang aga.

Base naman sa iya ginpa-blotter, ginsaysay sang masahista nga nagpadulong siya sa Kapitolyo bangud nagpanawag si Ledesma para sa massage service. Suno pa sa masahista, nagpaligo pa ang gwardya antes niya ginmasahe tubtob natabu ang ginpahayag nga rape.

Sa kuha sang CCTV camera sa Provincial Capitol, nagsulod si Ledesma kag isa ka babaye, las-9:33 sang aga kag nagguwa sila las-10:53 sang aga sang Mayo 25.

MEMO
Nag-isyu sang memorandum si Peace and Order-Security Services OIC Aaron Raymundo kag nagapangayo sang explanation kay Ledesma kon ngaa ginkuha niya ang liyabe sang opisina ni BM Tupas nga wala sang pahanugot kag nagpasulod sang indi otorisado nga tawo sa nasambit nga opisina.

Ginconfirmar ni Raymundo nga nabaton ni Ledesma ang memorandum sang Hunyo 2.

Wala pa nakabalik sa duty si Ledesma bangud on-leave.

Ginpadulungan sang Aksyon Radyo Iloilo reporter ang puluy-an niya pero wala siya. Ginpabilin man ang Aksyon Radyo sang contact number pero wala pa nakapakig-angut si Ledesma. (JoMaque)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply