Balasan, Iloilo – Nagpangayu sang bulig ang 25-anyos nga babaye matapos ginhold-up sa Batad Viejo, Batad sang, Hunyo 5 sang gab-i.

Suno sa tagreklamo nga si Charm, nagsakay siya sa motorsiklo nga ginamaneho sang suspek nga si Nilbert Francisco, 25-anyos sang Camambugan, Balasan.

Base sa iya panaysayon, nagalakat siya halin sa convenience store nga iya ginabantayan sa Balasan padulong sa plaza kag iya nakita nga nagapakadto-pakari si Francisco kag ginapilit siya nga magsakay agud magpadul-ong sa Batad.

Nagpasugot man ang babaye bangud gab-i na kag nagatalithi. Pag-abot sa Batad Viejo, nagpundo si Francisco kag naglisensiya nga magpangihi.

Pero sa baylo, iya ginkuha ang ginasukbit nga kutsilyo kag nagdeklarar sang hold-up.

Nakuha kay Charm ang iya cellphone lakip ang P4,500 nga kwarta nga naipit sa casing sang iya cellphone.

Nadakpan naman si Francisco pinaagi sa hot pursuit operation sang Batad police kag Balasan police sa Barangay Kinalkalan, Balasan, pasado las-tres kahapon, Hunyo 6.

Suno kay Police Lieutenant Alexander Lauron, hepe sang Balasan Police Station, madamo sila sang impormasyon nga nabaton nga yara nagapanago sa Kinalkalan ang suspect.

Sang nadakpan kag gin-presentar kay Charm, positibo nga gintudlo siya sang babaye nga amo ang nagpanghold-up.

Ginpanginwala naman ni Francisco nga siya ang nagpanghold-up sa babaye. (JoMaque)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply