Iloilo City — Wala nakasumiter sang kapin lima na ka bulan ukon halin sang Enero subong nga tuig ang apat ka mga barangay sa syudad sang ila Barangay Drug Abuse Council ukon BADAC report.

Ini base sa record sang Iloilo Anti Drug Abuse Council ukon ICADAC paagi sa Barangay Secretariat.

Base sa data, napaslawan nga makasumiter sang BADAC report ang mga barangay officials sang Arguelles kag Buntatala sa Jaro samtang Baldoza ka Hinactacan naman sa Lapaz.

Base sa Dangerous Drugs Board Regulation Number 3 series of 2017, dapat magsumiter ang BADAC sang ila report kada bulan sa CADAC ukon Municipal Anti Drug Abuse Council lakip sa opisina sang Department of the Interior and Local Government ukon DILG sa natungdan nga lugar.

‘DRUG AFFECTED’

Duha sa nasambit nga mga barangay ang moderately affected angut sa illegal nga druga base sa pinakaulihi nga record sang Philippine Drug Enforcement Agency ukon PDEA 6.

Moderetaly affected ang Brgy. Baldoza kag Arguelles samtang slightly affected naman ang Barangay Hinactacan kag Buntatala.

Base sa DDB Resolution Number 2 series of 2016, makabig moderaly affected ang barangay kun 2% tubtob 20% sang kabugusan nga populasyon sa barangay ang ginreport drug personalities kasubong sang drug users, drug pushers ukon drug financier.

Slightly affected naman ang barangay kun mas manubo sa 2% sa kabugusan nga populasyon ang ginreport drug personalities.

Una na ginpahayag ni PDEA 6 Officer-In-Charge Alex Tablate nga lantawon niya ang records agud matul-id kun may negligence sa mga BADAC rason wala nakasumiter sang report.

Mahimo mapreso sang halin anum ka bulan kag isa ka adlaw tubtob apat ka tuig kag mapenahan sang halin P10,000 tubtob P50,000 ang sin-o man nga magalapas sa anuman nga pagsulundan nga gin-issue sang Dangerous Drugs Board, luwas pa sang administrative sanctions nga mahimo ma-imponer sang Board.

‘DEPENSA’

Nagdepensa ang pila ka mga punong barangay matapos nalakip ang ila barangay sa wala nakasumiter sang BADAC report halin sang Enero tubbtob Mayo subong nga tuig.

Suno kay Buntatala, Jaro Punong Barangay Starlene Hosenilla, nakasumiter sila sang ila ‘BADAC report apang sa Jaro Police Station kag indi sa ICADAC.

Ginpahayag sang Mayo lang wala nakasumiter ang Buntatala sa pulis sang ila ‘BADAC report’.

Gin-ako naman ni Arguelles, Jaro Punong Barangay Eliodoro Ledesma Jr nga wala sila nakasumiter sang kapin lima na ka bulan bangud wala nakasumiter ang ila barangay secretary.

Ginpabutyag ni Ledesma nga may kapaslawan siya bangud wala na niya gincheck kun nakasumiter sang report ang barangay secretary nga si certain Ann-Ann Checosana.

Ginparesign sang punong barangay si Checosana kag nag-appoint sang bag-o nga sekretarya.

Ginatinguhan pa sang Aksyon Radyo nga makuhaan sang pahayag ang mga punong barangay sang Baldoza kag Hinactacan sa Lapaz angut sini. (JoMaque)

 

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply