5 pilason lakip ang manug-bata matapos nagbunggu-anay ang motorsiklo kag tricycle sa Guimaras

Guimaras — Lima pilason matapos nagbunggu-anay ang motorsiklo kag tricycle sa San Nicolas, Buenavista, Guimaras, las-tres y medya kahapon sang kaagahon, Hunyo 7.

Sakay sa tricycle ang manug-bata nga si Rasel Soberano, 25 kag live-in partner nga si Roger Ibañez, 35 samtang ginamaneho ini ni Reychelyn Soberano, 32, lunsay residente sang Buenavista.

Ginamaneho naman ni Ruzel Quizon, 25 ang motorsiklo, angkas si Sidel Magaguela pareho nga residente sang San Lorenzo, Guimaras.

Base sa imbestigasyon sang Buenavista police, wala matalupangdan sang driver sang tricycle ang kasugata nga motorsiklo bangud sila ang nagadali rason nga nagluntad ang pagbunggu-anay.

Natabu ang insidente sa gina-construct nga dalan. Gilayon sila nga gindala sa ospital agud madapatan sang pagbulong.

Nakabata naman si Soberano, pila ka oras matapos gindala sa ospital. (JoMaque)