Lalaki, nasapwan patay sa Bita-og Taytay, Sta. Barbara

Sta. Barbara, Iloilo — Patay na sang nasapwan ang lalaki sa higad sang karsada sa Bita-og Taytay, Sta. Barbara kagab-i, Hunyo 8.

Pasado las-9 sang gab-i sang may nabatian nga asod-asod nga lupok ang mga residente antes nasapwan ang wala pa makilala nga bangkay sang lalaki.

Nakasuksok siya sang pula nga jacket, itom nga sando, light brown nga shorts kag naka-tsinelas. Naka-duct tape ang iya kamot sang nasapwan.

May igu siya sang pagkatiro sa dughan, liog, likod kag patal nga pilas sa ulo.

May motorsiklo nga man naka-parking malapit sa ginahamtangan sang bangkay pero wala sang plate number.

Suno sa Sta. Barbara police, may naka-motorsiklo nga nakakita nga may SUV nga nagapundo malapit sa motorsiklo antes nabatian ang lupok. Ginapatihan nga sa SUV nakasakay ang suspetsado sa krimen.

Indi residente sang nasambit nga lugar ang biktima bangud indi siya kilala sang mga residente.

INTERVIEW SA SOCO CHIEF

Daku ang posibilidad nga ginpatay ang lalaki sa lugar kon sa diin siya nasapwan.

Wala pa makilala ang biktima nga ginabanta naga-edad 20 tubtob 30 anyos.

Suno kay Police Lieutenant Colonel Hilarion Roga sang Scene of the Crime Operatives ukon SOCO, sa lugar ginpatay ang biktima kon basehan ang mga recoveries.

Nakuha sa lugar ang lima ka basiyo sang bala sang pusil nga ginapatihan iya sang caliber .45 kag 9 mm.

Wala sang may na-recover nga identification card ukon may nakita nga identifying marks ukon tatoo sa lawas sang biktima.

May nakuha nga tatlo ka sing-sing sa tatlo ka tudlo sang lalaki sa iya nawala nga kamot.

Nagapadayon pa ang imbestigasyon sang mga police sa krimen. (JoMaque)