Iloilo City — Pierde ang public utility jeepneys ukon PUJ’s sa ginaduso nga Anti Counterflowing Ordinance ni Councilor Lyndon Acap nga nagahimo nga violation ang pag-overtake sang salakyan.

Ini ang ginapanindugan ni Iloilo City Loop Alliance of Jeepney Owners and Drivers Association ukon ICLAJODA President Raymundo “Boyet” Parcon kasunod nga nahibaluan ang kaundan sang ordinansa nga ginaduso ni Acap.

Base sa proposed ordinance, ginadumilian ang pag-overtake sang mga motorista nga nagalaksam sa opposite nga direction.

Suno kay Parcon mangin mahinay na ang pagbiyahe sang mga PUJ’s kag may posibilidad nga indi na magsakay ang mga pasahero ilabe na ang mga nagadali.

Nagapati si Parcon nga makapa-lala pa gid sa pagpugok sang trapiko ang ginaduso nga ordinansa bangud mangin mahinay na ang pagdalagan sang mga salakyan.

Indi man applicable suno sa iya ang ordinansa ilabe na sa dalanon halin sa Boulevard, Molo padulong sa Sto. Niño Sur, Arevalo bangud may yara lang sang duha ka lane.

“WALA MAKONSULTA ANG TRANSPORT GROUP”

Gin-aku ni Parcon nga wala makonsulta ang ila grupo antes ginduso ang ordinansa.

Una na nga nagsumiter sang position paper sa City Council ang ICLAJODA nga nagapamatok sa proposed ordinance.

Nakahanda man sila nga magtambong kon ipatawag sa public hearing agud talakayon ang amo nga ginaduso nga ordinansa. (JoMaque)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply