Iloilo — Plano ni anay Provincial Administrator Manuel Mejorada nga mag-file sang reklamo sa Office of the Ombudsman kag National Police Commission (NAPOLCOM) batok kay Police Major Jonathan Pinuela, ang chief sang Special Operations Group sang Iloilo Police Provincial Office (IPPO).

Kasunod ini sang pag-aresto kay Mejorada sa iya balay sa Pavia sang Hunyo 7 sang gab-i bangud sa lima ka counts sang cyber libel cases nga ginpasaka ni Governor Art Defensor.

Suno kay Mr. Mejorada, madamu na siya sang libel cases nga gin-atubang pero wala siya nakaagi experiensiya sang ka-arogante kag bastos nga pagtrato nga ginhimo sa iya ni Police Major Pinuela.

Ginpahayag ni Mejorada nga nangin matawhay ang pag-istorya niya kay Pinuela pero nagapaning-al ang pulis.

Naghingyo pa siya sa pulis kon puwede makatawag sa iya abogado pero naghambal suno sa iya si Pinuela nga pati ang iya abogado pakasuhan niya sang obstruction of justice.

Suno kay Mejorada, gulpi lang nagsulod sa iya balay si Pinuela nga wala naglisensya kag nagpakita sang warrant of arrest.

Dugang niya, wala man siya ginbasahan sang Miranda Rights.

Gin-claim ni Mejorada nga ginhan-an pa siya gabutan sang pusil ni Pinuela.

Gin-akusahan ni Mejorada si Pinuela nga wala sang kortesiya kag pagtaha sa iya nga senior citizen na.

Ginposasan man siya nga daw kapareho sang kriminal ukon drug lord.

Ginpabutyag ni Mejorada nga wala man siya sang plano nga magbato sa pulis.

Pangayuon ni Mejorada ang blotter report sang Pavia Police Station agud mahibaluan ang ngalan sang mga pulis nga kabahin sang arresting team kag mapasakaan sang kaso.

‘INDI MATUOD’

Ginpanghiwala naman ni Police Major Pinuela ang mga akusasyon ni Mejorada.

Nagpasalamat man siya nga wala sila ginkondenar base lang sa alegasyon sang anay Provincial Administrator.

Suno kay Pinuela, Biyernes sang gab-i na nila nakita sa iya balay si Mejorada kabangdanan ini man ang tiun nga ginserbe nila ang warrants of arrest.

May impormasyon si Pinuela nga sa kada may ipabaton nga subpoena kay Mejorada, wala siya nagapakita kag mabudlay maaktuhan sa iya balay.

Ini ang rason kun ngaa “gindiskartehan” man nila ang pagserbe sang warrant kay Mejorada.

Naggamit sila sang asset para makumpirmar nga ara gid man sa balay ang subject sang warrant.

Ang boy ni Mejorada suno kay Pinuela ang nagbukas sang gate sang nag-doorbell ang babaye nga gingamit nila nga asset nga nagpakunu-kuno nga mangayo sang bulig.

Nagdali-dali panaug si Mejorada suno kay Pinuela halin sa ibabaw sang balay sang nakita ang babaye kag ginpasulod.

Samtang naga-istoryahanay ang asset kag si Mejorada, nagpalapit man sa gate ang grupo ni Pinuela kag nagpakilala sa boy nga upod sila sang babaye. Ginpasulod man sila sa balay.

Suno kay Pinuela, “nag-maayong gab-i” pa sila kay Mejorada kag nagpakilala antes ginhambalan nga may warrant para sa iya.

Pagkabati ni Mejorada, ginkwestyon niya ang otoridad ni Pinuela kag kun nga-a gab-i na ginserbe ang warrant.

Ginpahayag ni Pinuela nga wala niya una ginposasan si Mejorada bangud nakahibalo man siya nga indi ini bayolente nga tawo.

Nagdesisyon na lang si Pinuela nga posasan si Mejorada sang nabatian niya nga nanugid sa kaistorya sa telepono nga ginposasan siya bisan nga wala pa sang posas sa amo nga tiun.

Dugang pa ni Pinuela, nagpakita sang kaarogante si Mejorada.

Ginpahayag ni Pinuela nga ginhambalan man sang iya kinamatarong si Mejorada.

Ginpanghiwala ni Pinuela nga ginhanaan niya nga gabutan sang pusil si Mejorada.

Nakahanda si Pinuela nga atubangon ang kaso ni Mejorada.

Nagapati si Pinuela nga wala siya sang may ginlapas nga kinamatarong ni Mejorada kag wala man siya sang personal nga kaakig sa subject. (AGB/MO)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply