2 dialysis center sa Negros Occidental, nagpabayad sa Philhealth bisan napatay na ang mga pasyente nga nag-avail sang serbisyo

Iloilo City — Nadiskubrehan sang PhilHealth 6 ang tuyo pagpabayad sa ila sang duha ka dialysis center sa Negros Occidental bisan napatay na ang mga pasyente nga ginreport nag-avail sang amo nga medical service.

Ini suno kay Janimhe Jalbuna, head sang Public Affairs Unit sang PhilHealth 6.

Suno kay Jalbuna, nadetect sa ila system ang pagclaim sang bayad sang duha ka wala pa ginhingadlan nga mga dialysis centers rason napunggan ang transaksyon.

Ginreport na sang tagdumalahan sang mga dialysis centers sa PhilHealth 6 nga napatay ang gintumod nga mga pasyente apang liwat pa sila nga nagclaim sang P2,600 nga bayad sa kada session.

Base sa inisyal nga imbestigasyon suno kay Jalbuna, posible may sala sa documentation sang mga establishmento.

Wala gilayon nagdagdag sang sanction ukon penalidad ang PhilHealth bangud nagapadayon pa ang ila imbestigasyon angut sini. (AGB/AT)