General Services Office, indi pa mag-transfer sang mga salakyan nga ginapa-assign ni Mayor Joe Espinosa sa iban nga opisina

ILOILO CITY — I-hold sang General Services Office ang Property Acknowledgment Receipt (PAR) sang pito ka Toyota Hilux FX nga gin-request ni Mayor Joe Espinosa nga ipa-transfer sa Business Permits and Licensing Office, Task Force Boltahe, Senior Citizen’s Office, City Planning and Development Office, City Social Welfare and Development Office Dalayunan, Iloilo City Anti-Smoking Task Force kag Sports Development Office.

Suno kay GSO head Joren Sartorio, manogtapos na ang term ni Espinosa kag bilang respeto sa masunod nga administrasyon, mas maayo kun hulaton na lang ang masunod nga Mayor agud mahibaluan kun diin gid man nga opisina makadto ang mga salakyan.

Ginpahayag ni Sartorio nga mahimo gihapon magamit sang mga nasambit nga opisina ang mga salakyan.

Ang Mayor ang may poder suno kay Sartorio kun sa diin ipasaylo ang mga salakyan.

Dugang pa niya, pwede man gihapon ipasaylo sang masunod nga administrasyon sa iban nga opisina ang mga salakyan rason nga hulaton na lang ang incoming administration para indi na magbalik-balik ang papeles. (JoMaque/JV)