Iloilo — Ginabulong sa Iloilo Provincial Hospital ang 42 anyos nga amay bangud sang pilas sa ulo matapos ginlampusan sang wasay sang iya bata sa Rumbang, Pototan, las 6 sang Hunyo 12 sang aga.

Napilasan sa ulo si Janival Masula, matapos makaduha ka beses nga ginlampusan sang iya bata nga si Percival, 19 anyos.

Suno kay Police Staff Sergeant Raffy Gonzales, imbestigador sang Pototan Municipal Police Station, may ginabaisan ang biktima kag ang iya asawa tubtob nga nasumbagan sang bana ang asawa.

Nakita sang ila bata ang ginhimo sang iya amay rason iya ginkuha ang wasay nga nasab-it sa ila dingding kag ginlampus sa iya amay.

Gin-athag sang pulis nga likod sang talum sang wasay ang nag-igo sa ulo sang tatay.

At-large si Percival matapos nga nagpalagyo pagkatapos sang insidente.

Na-recover sa lugar ang wasay nga gingamit sang suspect sa paglampus sa iya amay.

Wala sang plano nga magpasaka sang kaso ang amay sa iya bata suno kay PSS Gonzales. (JoMaque)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply