Pagkapatay sang subject sa buy bust operation sa Mandurriao, imbestigaran sang CHR 6

Iloilo City — Imbestigaran sang Commission on Human Rights ukon CHR 6 ang pagkapatay sang 39-anyos nga subject sa buy bust operation sa Barangay Guzman Jesena, Mandurriao matapos ginpahayag nagbato sa pulis.

Ginkunfirmar ni Mr. Edgardo Luis, supervising investigator sang CHR nga nagahimo sila sang motu propio investigation sa pagkapatay ni Giovanni Mejica Jr., pumuluyo sang amo nga barangay.

Kuhaan sang statement sang CHR ang pamilya sang subject nga nakasaksi sang insidente lakip ang mga pulis nga naghimo sang drug operation.

Una na ginpahayag ni Police Major Marlon Valencia, hepe sang Mandurriao Police Station nga una gintiro sang subject ang back-up police rason nagdepensa sila kag gintiro man si Mejica.

Nanindugan naman si alyas Nene, utod sang subject, nga hinali lang nagsulod sa ila balay ang operatiba kag gindumilian sila nga makapalapit sa subject tubtob nga nabatian ang mga lupok sang pusil kag nasapwan nga duguon na si Mejica.

Una na ginreport nga napatay man ang subject sa buy bust operation sa Rizal Street, Pototan sang Marso 26 matapos ginpahayag nagbato sa pulis.

‘NATIONWIDE’

Ginkunfirmar ni Luis nga indi lang sa Western Visayas nagakatabo nga napatay ang subject sang buy bust operation bangud ini ang sitwasyon sa bug-os nga pungsod.

Magluwas sa suspected shabu, masami man nga narecover sa crime scene ang . 38 caliber revolver kag granada.

90% sang mga narecord nga insidente angut sa pagkapatay sang subject matapos ginpahayag nagbato sa pulis ang nakuhaan sang nasambit nga mga items.

KOOPERASYON SANG PAMILYA; PASA-PASA SANG MGA PULIS

Ginpabutyag ni Luis nga dako ang mabulig sa ila imbestigasyon kun magkooperar ang pamilya sang natungdan kag maghatag sang pahayag angut sa insidente.

Naobserbahan nga masami wala na nagahatag sang pahayag ang pamilya sang subject sang nakaligad nga mga tinuig apang amat amat na sila nga nagakooperar.

Nabudlayan naman ang CHR sa pagkuha sang bahin sang natungdan nga mga pulis bangud masami sila nga ginarefer sa ila higher office.

Suno kay Luis, una sila nga irefer sa chief of police apang irefer naman liwat sa director sa lugar, Police Regional Office 6 tubtob sa Camp Crame.

Kun may makita nga probable cause ang CHR, sila ang mapasaka sang kaso batuk sa mga natungdan. (JoMaque/ATT)