Lapaz, Iloilo City – Patay ang construction worker matapos ginbuno sang kasubong nga construction worker sa Zone 1, Baldoza, Lapaz pasado las-9 kagab-i, Hunyo 16.

Ginkilala ang biktima kay Jessie Pacalinga, 56 anyos sang Manaolan, Badiangan nga may madamo nga pilas sa lawas lakip ang patal nga pilas sa liog.

Samtang suspek naman si Junifer Jumwad sang Poblacion, Barotac Viejo.

Suno sa pintor nga si Joemar Barniza, kaupod man sang duha sa trabaho, naga-inom-inom ang biktima kag suspek antes natabu ang insidente kaupod man ang ila mga katrabaho.

May ginbaisan ang duha suno kay Barniza angut sa ila mga papel sa trabaho.

Ginsaway pa ang duha pero nagbunot sang kutsilyo ang suspek kag ginbuno ang biktima.

“SELF DEFENSE”

Nagapanindugan si Jumwad nga gindepensahan lang niya ang iya kaugalingon batuk sa biktima.

Suno sa iya, pakaw sang bomba lang ang iya gina-uyatan. Dugang pa ni Jumwad, naagaw lang niya ang kutsilyo sa biktima.

Nakahanda man siya nga atubangon ang ipasaka nga kaso batuk sa iya.

IMBESTIGASYON SANG POLICE

Hinubog ang ginasundan nga motibo sang Lapaz police.

Suno kay Police Senior Master Sergeant Allen Silda, imbestigador sang Lapaz Police Station, nagaguwa sa ila imbestigasyon nga wala sang gin-awayan ang duha antes ang krimen kundi nagluntad lang ini sang sila ang nag-inom-inom.

Ginatudlo sang kaupdanan sang duha nga ginbuno ni Jumwad si Pacalinga.

Ginapanginwala man sang suspek suno kay Silda ang statement sang mga testigo sa krimen.

Una nga nagpalagyo ang suspek pero nadakpan sa hot pursuit operation pasado las-11 sang gab-i.

Padayon pa ang imbestigasyon sang Lapaz police. (JoMaque)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply