Oton, Iloilo — Nadakpan ang mag-abyan sa magkatuhay nga drug buy bust operation sang Oton Police Station-Drug Enforcement Unit kagab-i, Hunyo 19.

Una nga naaresto sa Abilay Norte, Oton si Rhynz Pollan, 22 sang Poblacion South, Oton alas-6:15 sang gab-i.

Walo ka sachets sang suspected shabu ang nakuha kay Pollan nga nanginwala nga nagabaligya siya sang illegal drugs, pero nag-ako nga nakagamit sang una sang shabu apang nag-untat na.

Ginpahayag ni Abilay Norte Punong Barangay Serafin Clavel II, wala nalakip sa ila Barangay Anti-Drug Abuse Council ukon BADAC report si Pollan bangud indi man siya tumandok kag nagatrabaho lang bilang construction worker sa ila lugar.

Sunod nga nadakpan mga alas-9 sang gab-i ang abyan ni Pollan nga fish vendor nga si Noel Ortega, 29 anyos sang Poblacion South, Oton.

Nakuha sa iya ang pito ka sachets sang suspected shabu.

Nanginwala man si Ortega nga nagabaligya siya sang shabu kag nagpahayag nga planted ang nakuha sa iya nga items.

Separado ang operasyon batuk kanday Pollan kag Ortega suno kay Police Major Gervenson Moyo, hepe sang Oton Police Station, kag nahimo bangud sang mga impormasyon halin sa pumuluyo. (AGB)

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.