(UPDATE) 18 anyos nga trabahador sa frozen foods factory sa Lapuz, posible na-suffocate sang mga ingredients rason nga napatay suno sa police

By: Aine Grace Bravo | June 24, 2019, 6:30PM

Iloilo City — Posible nga na-suffocate sang mga ingredients sa mixer sang frozen foods ang 18 anyos nga trabahador nga nangin rason sang iya kamatayon.

Ini ang ginpaathag sang imbestigador sang Lapaz Police Station sa tag-iya sang frozen foods factory sa Mansaya, Lapuz kasunod sang paglamon sang makina kay Jomar Junco Bugoy sang Laua-an, Antique.

Nagapati si Mrs. Josielor Jaleco, tag-iya sang factory, nga gintinluan ni Bugoy ang nagalapta nga ingredients sa kilid sang mixer apang nahulog ang scraper. Posible nga gintinguhaan nga kuhaon ni bugoy ang nahulog nga scraper, pero nalipat nga nagaandar pa ang mixer gani nasuok ang iya kamot tubtub nalamon siya.

Ini ang rason suno kay Mrs. Jaleco nga nabali ang kamot ni Bugoy.

Posible man suno sa iya nga nakasinggit sang tabang si Bugoy pero wala na nabatian sang iya upod nga si alyas Karl bangud nagkadtu siya sa balay kag nagkuha sang kaldero para tig-angan.

Una na ginpahayag ni Karl nga nakita niya na lang nga yara na sa ibabaw ang tiil ni Bugoy gani ginhingagaw niya kakas ang plug kag kuhaon si Bugoy pero nalamon na ang katunga sang lawas sang lalaki.