Driver sang sports car nga nakabunggo patay sa mag-asawa nga Osano, nangayo 15 adlaw nga extension agud magsabat sa gin-issue nga show cause order sa iya sang LTO 6

By:JoMaque | June 25, 2019, 9:31 AM
Via Aksyon Aljohn Torreta

Iloilo City – Nakasumiter na sang sabat sa show cause order sang Land Transportation Office 6 ang driver sang sports car nga nakabunggo patay sa mag-asawa nga Joe Marie kag Alnie Dinah Osano samtang nagatabok sa Diversion Road, Mandurriao.

Gin-confirmar ni Ms. Riza Otayde, Public Information Officer sang LTO 6, nga nabaton nila ang sabat ni June Paul Valencia sang Sabado.

Subong nga adlaw, nagtakop ang lima ka adlaw nga ginhatag sang LTO 6 kay Valencia agud sabton ang show cause order.

Base sa sulat ni Valencia, naghingyu siya sang 15 ka adlaw nga extension sugod subong nga adlaw agud makahatag sang tul-id nga paathag sa natabu bangud yara pa siya sa ‘mental confusion’ sa subong.

Ginpabutyag ni Otayde nga ginsumiter na kay LTO 6 Director Roland Ramos ang request ni Valencia kag ginahulat pa ang iya desisyon.

Una na nga ginsuspender sang 90 ka adlaw ang driver’s license ni Valencia.