Frozen foods factory sa Lapuz nga napatyan sang trabahador, gin-isyuhan sang DOLE sang work stoppage order; factory, may mga violations base sa DOLE inspection

By: Aine Grace Bravo | June 25, 2019, 6:30PM

Via Aksyon KhenJo Terco

Iloilo City — May mga violations sa ginapatuman nga kasugu-an sang Department of Labor and Employment ukon DOLE ang Frozen Food factory sa barangay Mansaya, Lapuz nga napatyan sang 18 anyos nga si Joemar Bugoy.

Suno kay Joselito Dela Banda, Director II sang Iloilo Field Office sang DOLE, sa ila gin – conduct nga inspection sa factory ila nakit-an nga violations amo nga wala sang business registration with DOLE ang factory; wala sang safety officer; wala gilayon naka-submit sang accident report sa DOLE; kag wala sang mga safety signage.

Base sa section 29 sang Occupational Safety and Health Standard (OSH) law, dapat makapadala sang accident report ang employer kun naaksidente ukon napatay ang iya empleyado.

Mahimo suno kay Director Dela Banda nga mamultahan sang P100, 000 ang tag-iya sang frozen food factory bangud sang kapaslawan, apang ma-hearing pa sila upod ang tag-iya sang factory angut sa natabo agud mahatagan sang due process ang tag-iya.

Bangud sang pila ka mga violations, nag-issue sang stoppage order sa pag-operate ang DOLE sa frozen food factory kag ma-lift lang ini kun makita sang DOLE nga indi na delikado ang factory para sa mga empleyado.