(UPDATE) Time-extension nga ginhingyo sang driver sang sports car nga nakabunggo-patay sa mag-asawa sa Diversion Road agud magsabat sa LTO 6, ginpasugtan

By: Aine Grace Bravo | June 25, 2019, 6:30PM

Via Aksyon Aljohn Torreta

Iloilo City — Ginpasugtan sang Land Transportation Office (LTO) 6 ang ginhingyo sang driver sang sports car nga nakabunggo patay sa mag-asawa nga Osano sa Mandurriao ang dugang nga 15 ka adlaw sa pagsumiter sang iya pahayag angut sa insidente.

Ini matapos ginserbihan sang show cause order ang 32-anyos nga si June Paul Valencia, magluwas pa sa 90 ka adlaw nga suspension sang iya driver’s license.

Ginkunfirmar ni LTO 6 Spokesperson Riza Otayde nga ginpasugtan ni LTO 6 Director Roland Ramos ang apelasyon ni Valencia nga extension bangud sang ‘human consideration’.

Base sa ginpadala nga sulat ni Valencia, ginpahayag niya nga may ‘mental confusion’ pa siya rason indi pa makasabat sa gin-issue nga show cause order.

Hunyo 24 sang nagtakop ang lima ka adlaw nga prescribed period para makasumiter si Valencia sang iya pahayag angut sa insidente.