Pagdakop sang mga pulis kag soldado sa ginpahayag NPA leader matapos ginserbihan sang warrant of arrest nga may lain nga ngalan, illegal – CHR 6

By: JoMaque | June 26, 2019, 12:32 PM

Iloilo City (UPDATE) — Illegal ang pag-aresto sang mga pulis kag soldado sa 53-anyos nga lalaki nga ginpahayag leader sang New People’s Army sang ginserbihan sang apat ka mga warrants of arrest sa Poblacion Tacas, Cuartero, Capiz sang Hunyo 23.

Ini suno kay Commission on Human Rights (CHR) 6 Director Atty. Jonie Dabuco.

Suno kay Atty. Dabuco, lain ang ngalan nga nakabutang sa mga warrants of arrest ipaanggid sa ngalan sang gindakop nga si Baltasar Saldo.

Kuntani, gindala sang mga otoridad sa korte nga nag-issue sang mga warrants of arrest ang witness nga nagtudlo nga si Saldo kag ang subject nga si Virgilio Paragan ang isa lang antes pa man gin-conduct ang police operation. Ini agud mailisan ang subject sang warrants of arrest base sa Rules of Court.

Una na ginpahayag ni Police Regional Office 6 Director Pol. Brig. Gen. John Bulalacao nga gingamit ni Saldo ang ngalan nga Virgilio Paragan sang nangin commanding officer siya sang Roger Mahinay Command, Komiteng Rehiyon-Negros sang NPA sugod 2000 tubtob 2004.

Ginpresentar sa mga katapo sang media si Saldo lakip ang witness nga nagkunfirmar nga si Saldo kag si Paragan ang isa lang sang Hunyo 24.

Sa amo man nga adlaw, gin-release sang mga pulis sa Kabankalan si Saldo bangud wala ginbaton sang prosecutor ang affidavit sang witness.

Suno kay PRO 6 Spokesperson Pol. Lt. Col. Joem Malong, dapat ilisan anay ang ngalan sang subject sa matuod nga ngalan sang gindakop.

Nagpasalig naman si Malong nga sundon nila ang legal nga proseso.