(UPDATE) 5 Grade 8 students nga babaye sa San Rafael National High School, na-suffocate bangud gutok ang classroom

By: Aine Grace Bravo | June 27, 2019, 6:30PM

Via Aksyon Francisco Enar

San Rafael, Iloilo — Indi anum kundi lima lang ka mga Grade 8 students sa San Rafael National High School ang na-suffocate ukon napu-ot sa eskwelahan.

Gintadlong man sang Principal nga si Denia Ballaret nga natabu ang insidente sang Lunes, Hunyo 24 kag indi kahapon sang aga, Hunyo 26.

Una dire nagguwa ang impormasyon nga may mga estudyante nga naglaslas sang pulso pero ginpa-athag sang principal nga wala sang kamatuoran ang amo nga balita.

Ginpahayag naman sang adviser nga si Mark Blaza nga natabu ang pagkalalipong sang mga estudyante sang nag-brownout las 9:30 tubtob las onse sang aga sang Lunes, Hunyo 24.

Suno kay Ballaret, nagdugang sa kainit ang kadamuon sang estudyante sa classroom. Naglab-ut suno sa iya sa 64 ka mga estudyante ang yara sa klase sang natabu ang insidente.

Indi man suno sa iya mahimo tung-on ang klase bangud wala sang may mauyat nga maestra.

Sang ginpadulungan sang Aksyon Radyo Iloilo ang eskwelahan, nakita nga napalibutan ang classroom sang mga matag-as nga buildings kabangdanan halos indi makalusot ang hangin.