Iloilo Schools Division, nagpasalig sayluhon sa maligwa nga classrooms ang nagaginutok nga estudyante sa San Rafael National High School

By: Aine Grace Bravo | June 29, 2019, 6:30PM

Iloilo City — Nakalab-ot na sa talatapan sang Iloilo Schools Division ang report sang principal sang San Rafael National High School sa San Rafael, Iloilo angut sa pagka-suffocate sang lima ka Grade 8 students sang Hunyo 24 sang aga.

Suno kay Dr. Gilbert Solidum, Chief Education Supervisor of Schools Governance and Operations sang DepEd Iloilo, kakulang sang ventilation sa classroom ang rason sang pagkapu-ot sang mga estudyante sa ila klase.

Ginpaathag naman ni Solidum nga temporaryo lang ang pag-antos sang mga estudyante bangud plano man sila nga sayluhon sa mas maligwa nga classrooms kon mahuman na ang ginapatindog nga school buildings.

Sang ginkadtuan sang Aksyon Radyo ang eskuwelahan, nakita nga napalibutan sang mas mataas nga buildings ang classroom nga ginahamtangan sang Grade 8 students.

Una na ginpabutyag ang principal nga si Ms. Denia Ballaret nga natabuan nga brownout sang amu nga tiun gani naglain ang pamatyag sang mga estudyante.