By: JoMaque | July 2, 2019, 8:16am
Via Firingline | Interview with ICPO Director Police Colonel Martin Defensor Jr.

Iloilo City — Ginpabugal ni Iloilo City Police Office (ICPO) Director Police Colonel Martin Defensor Jr nga daku ang nabulig agud mapanubo ang krimen sa siyudad sang ginpatuman ang Executive Order 146 nga nagadumili sa pagserbe sang makahulubog nga ilimnon pag-abot las-dos sang kaagahon.

Reaksyon ini ni Defensor sa plano ni Mayor Jerry Treñas nga dulaon ang EO nga ginpaguwa ni anay Mayor Joe Espinosa sang 2017.

Base sa crime statistics nga gin-uyatan sang ICPO, nangin epektibu ang EO kag daku ang nabulig agud mapanubo ang krimen.

Kon si Defensor ang pasugtan, mas pakamaayuhon niya nga ipabilin ang amo nga EO.

Una na nga nagpabutyag si Defensor nga suportahan sang police kon magdesisyon si Mayor Treñas nga ipa-repeal ang EO.

May yara lang suno sa iya sang adjustments sa mga pulis nga on-duty kag dugangan ang deployment ilabe na sa Mandurriao sa diin nahamtang ang kadam-an nga business establishments nga nagaserbe sang makahulubog nga ilimnon.

Ginpangabay man niya ang mga tag-iya sang business establishments nga magdugang sang bouncer kag hugton sang security guards ang pagbantay kon mag-epekto na ang pagdula sa EO 146.

Ginpasalig naman ni Defensor nga hugton man sang police ang pagbantay sa mga lugar ilabe na kon kaagahon.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply