34 anyos nga lalaki, ginbuno patay sa Passi City; suspek, nagsurrender
By: Aine Grace Bravo | July 3, 2019, 6:30PM
Via Aksyon Angel Mae Ciudad
Passi City, Iloilo — Patay ang 34 anyos nga lalaki nga nabun-an sa Gines Viejo, Passi City pasado alas-6 kaina sang aga.
Ginkilala ang biktima kay Allan Taberna sang Quinagaringan Pequeño, Passi City nga may pilas sa dughan, tiyan, wala nga paa kag likod.
Nag-surrender naman ang suspek nga si Jonel Pagdato, 30 anyos.
Sa imbestigasyon ni Police Chief Master Sergeant Niel Amador sang Passi City Police Station, nagsugat-anay ang biktima nga nagasakay sa motorsiklo kag suspek nga nagasakay sa pick-up.
Nagbaisay suno sa iya ang duha, tubtob nga nagpanaug sa ila salakyan kag nagtapungulay.
Pero ginpahayag nga nagbalik si Pagdato sa iya salakyan, nagkuha sang kutsilyo, kag ginbalikan si Taberna kag ginbuno.
Gindala pa si Taberna sa ospital, pero napatay mga alas-10 sang aga.