Pulis nga nagreklamo ginsakit sadtu ni anay Cong. Richard Garin, ginreklamo nga nanipa sang kudal kag nagpamahog sa Jaro

By: JoMaque | July 3, 2019, 12:34 PM

Jaro, Iloilo City — Nagreklamo sa Jaro Police Station ang mag-lolo nga Pio Roy Conde, 26, kag retired SPO3 Celso Conde batuk kay Police Master Sergeant Federico Macaya Jr sa Zone 4, Sambag, Jaro mga alas-kuwatro kahapon sang hapon, Hulyo 2.

Si Macaya sa madumduman ang nagreklamo sang una nga ginsakit ni former Congressman Richard kag Guimbal Mayor Oscar Garin.

Suno kay Pio Roy, nagbaisay sila ni Macaya antes ang pagsipa sang pulis sang ila kudal.

Nagsugod suno kay Pio Roy ang tanan sang nagreklamo ang asawa ni Macaya angut sa mabaho nga iti sang manok nga ginapanag-iyahan sang pamilya Conde.

Suno naman sa iloy ni Pio Roy, nagpa-blotter na lang sila sa police station bangud ginpahayag nga naghambal si Macaya nga “humanda ka, may adlaw ka gid.”

Nagpamalibad pa si Macaya nga magpa-interview sang ginkuhaan sang pahayag bangud nagadali siya nga mag-duty.