By: JoMaque | July 4, 2019, 9:46PM
Via Firingline| Interview with Councilor Romel Duron

Iloilo City — Nagpasalig ang ginaduso nga chairman sang Committee on Transportation sa City Council nga tun-an niya ang mga tikang agud mapahagan-hagan ang iya gintawag nga ‘problematic’ nga problema sa trapiko.

Gin-aku ni Councilor Romel Duron nga problema gid man sang mga highly urbanized cities pareho sang Iloilo City ang trapiko.

Gintumod niya nga pila ka mga rason sang pagpugok sang trapiko ang kawad-an sang disiplina sang iban nga drivers, pagtabok bisan diin lang, pag-biyahe sang mga e-trikes kag madamo nga iban pa.

Suno sa iya, tun-an niya ang mga existing ordinances sa siyudad nga makabulig sa pagpahagan-hagan sang trapiko pero wala pa mapatuman. Isa diri suno kay Duron ang “Speed Limit Ordinance” nga 2015 pa ginpasar kag gin-amendaran sang 2017 pero wala gihapon ma-implementar.

Pamangkuton ni Duron si Public Safety and Transportation Management Office (PSTMO) Head Jeck Conlu kon ngaa wala mapatuman ang ordinansa.

Magluwas diri, magapamangkot man siya sa mga incumbent city officials angut sa existing ordinance.

Sa initial nga plano ni Duron, magapatuman sang rerouting scheme kag iplastar ang mga traffic signs kag traffic lights.

Nagpahayag man si Duron nga bag-o lang siya nga konsehal gani tun-an niya ang tanan, kag makonsulta man sa mga stakeholders paagi sa committee hearing agud makadihon sang epektibu nga mga solusyon.

By admin@aksyonradyoiloilo.com.ph

Manila Broadcasting Company Suite 301 Carlos Uy Bldg., Diversion Road, Mandurriao, Iloilo City 5000 Philippines.

Leave a Reply